Hyginus Fabulae, 98. Iphigenia.

     Jupiter, Neptune, and Mercury went to Thrace to enjoy hospitality at king Hyrieus' home. Since they were received warmly by him, they gave him a choice to choose whatever he desired. He chose to have children. Mercury took the hide from the bull Hyrieus himself had sacrificed. The gods urinated upon it and stretched it upon the ground, and from it Orion was born. When Orion desired to rape Diana, he was killed by her. Later he was taken up into the constellations, which constellation men call Orion.
     — translation RTMacfarlane


     195. orion
Iouis Neptunus Mercurius in Thraciam ad Hyrieum regem in hospitium uenerunt; qui ab eo cum liberaliter essent excepti,optionem ei dederunt si quid peteret. ille liberos optauit. 2. Mercurius de tauro quem Hyrieus ipse eis immolarat corium protulit; illi in eum urinam fecerunt et in terram obruerunt, unde natus est Orion. 3. qui cum Dianam uellet uiolare, ab ea est interfectus. postea ab Ioue in stellarum numerum est relatus, quam stellam Orionem uocant.

Hyginus, Astronomica, 2.21.4, 26, 33-34
     Sed has Pliadas antiqui astrologi seorsum a Tauro deformauerunt, ut ante diximus, Pliones et Atlantis filias. Quae cum per Boeotiam cum puellis iter faceret, Oriona concitatum uoluisse ei uim ad ferre; illam fugere coepisse, Oriona autem secutum esse annos septem neque inuenire potuisse. Iouem autem puellarum misertum, inter astra constituisse, et postea a nonnullis astrologis caudam Tauri appellatas. Itaque adhuc Orion fugientes eas ad occasumsequi uidetur. Eas stellas nostri Vergilias appellauerunt, quod post uer exoriuntur, et hae quidem ampliorem ceteris habent honorem, quod in earum signo exoriente aestas significatur, occidente autem hiems ostenditur, quod aliis non est traditum signis.
     Scorpius. Hic propter magnitudinem membrorum in duo signa diuiditur, quorum unius effiiem nostri Libram dixerunt. Sed omnino totum signum hac de causa statutum existimatur, quod Orion cum uenaretur, et in eo exercitatissimum se esse confideret, dixisse etiam Dianae et Latonae se omnia, quae ex terra oriantur, interficere ualere. Quare Terram permotam scorpionem misisse, qui eum interficeret, demonstratur. Iouem autem utriusque animumadmiratum, scorpionem inter astra conlocasse, ut species eius hominibus documento esset, ne quis eorum aliqua re sibi confideret. Dianam autem propter studium Orionis petisse ab Ioue, ut idem illi beneficium daret petenti, quod Terrae ultro tribuisset. Itaque eum ita constitutum, ut cum Scorpius exoriatur, occidat Orion.
     
2.33 Lepus. Hic dicitur Orionis canem fugere uenantis. Nam cum, ut oportebat, eum uenatorem finxissent, uoluerunt etiam significare aliqua de causa; itaque leporem ad pedes eius fugientem finxerunt. Quem nonnulli a Mercurio constitutum dixerunt, eique datum esse, praeter cetera genera quadrupedum, ut alios pareret, alios haberet in uentre. Qui autem ab hac causa dissentiunt, negant [oportere] tam nobilem et tam magnum uenatorem, de quo et ante in Scorpionis signo diximus, oportere fingi leporem uenari. Callimachum quoque accusari quod, cum Dianae scriberet laudes, eam leporum sanguine gaudere et eos uenari dixisset. Itaque Oriona cum Tauro decertantem fecerunt. Leporis autem hanc historiam memoriae pro diderunt: apud antiquos in insula Lero nullum leporem fuisse, sed ex eorum ciuitate adulescentium quemdam, studio generis inductum, ab exteris finibus leporem feminam praegnantem adtulisse et [ad] eius partum diligentissime administrasse. Itaque cum peperisset, compluribus eius ciuitatis studium incidisse et partim pretio, partim beneficio mercatos omnes lepores alere coepisse. Ita non longo interuallo tantam multitudinem leporum procreatam, ut tota insula ab his occupata diceretur. Quibus cum ab hominibus nihil daretur, in semina eorum impetu facto omnia comederunt. Quo facto incolae calamitate adfecti, cum fame forent oppressi, communi consilio totius ciuitatis uix denique eos ex insula abegisse dicuntur. Itaque postea leporis figuram in astris constituisse, ut homines meminissent nihil esse tam exoptandum in uita, quin ex eo plus doloris quam laetitiae capere posterius cogerentur.

     
2.34 Orion. Hunc Hesiodus Neptuni filium dicit, ex Euryale Minoïs filia natum; concessum autem ei ut supra fluctus curreret ut in terra, quemadmodum Iphiclo datum dicitur ut supra aristas curreret neque eas infringeret. Aristomachus autem dicit quemdam Hyriea fuisse Thebis, Pindarus autem in insula Chio. Hunc autem, cum Iouem et Mercurium hospitio recepisset, petisse ab his ut sibi aliquis liberorum nasceretur. Itaque quo facilius petitum inpetraret, bouem inmolasse et his pro epulis adposuisse. Quod cum fecisset, poposcisse Iouem et Mercurium quod corium de boue foret detractum et quod fecerant urinae in corium infudisse, et id sub terra poni iussisse. Ex quo postea natum puerum, quem Hyrieus e facto Vriona nomine appellaret; sed uenustate et consuetudine factum esse ut Orion uocaretur. Hic dicitur Thebis Chium uenisse et ibi Oenopionis filiam Meropen per uinum cupiditate incensus conpressisse. Pro quo facto ab Oenopione excaecatus et de insula eiectus existimatur Lemnum ad Vulcanum peruenisse et ab eo quemdam ducem Cedaliona nomine accepisse. Quem collo ferens dicitur ad Solem uenisse et ab eo sanatus, ut se ulcisceretur, Chium reuertisse. Oenopiona autem a ciuibus sub terra custoditum esse. Quem postquam se inuenire posse desperaret Orion, in insulam Cretam peruenisse, et ibi uenari coepisse cum Diana, et ei polliceri quae supra diximus, et ita ad sidera peruenisse. Nonnulli autem aiunt Oriona cum Oenopione prope nimia coniunctum amicitia uixisse, et quod ei uoluerit suum studium in uenando probare, Dianae quoque pollicitum quae supra diximus; et ita interfectum. Alii dicunt cum Callimacho, cum Dianae uim uoluerit adferre, ab ea sagittis esse confixum et ad sidera propter uenandi consimile studium deformatum. Istrus autem dicit Oriona a Diana esse dilectum et paene factum ut ei nupsisse existimaretur. Quod cum Apollo aegre ferret et saepe eam obiurgans nihil egisset, natantis Orionis longe caput solum uideri conspicatus, contendit cum Diana eam non posse sagittam mittere ad id quod nigrum in mari uideretur. Quae se cum uellet in eo studio maxime artificem dici, sagitta missa caput Orionis traiecit. Itaque eum cum fluctus interfectum ad litus eiecisset et se eum Diana percussisse plurimum doleret, multis eius obitum prosecuta lacrimis, inter sidera statuisse existimatur. Sed quae post mortem eius Diana fecerit, in eius historiis dicemus.